| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 21.18 | Dem. 21.21 (English) | >>Dem. 21.24 |
21.20ἐφʼ οἷς τῶν πεπονθότων οἱ μέν , ὦ ἄνδρες δικασταί , καταδείσαντες τοῦτον καὶ τὸ τούτου θράσος καὶ τοὺς περὶ αὐτὸν ἑταίρους καὶ πλοῦτον καὶ τἄλλʼ ὅσα δὴ πρόσεστι τούτῳ , ἡσυχίαν ἔσχον , οἱ δʼ ἐπιχειρήσαντες δίκην λαμβάνειν οὐκ ἐδυνήθησαν , εἰσὶ δʼ οἳ διελύσαντο , ἴσως λυσιτελεῖν ἡγούμενοι . τὴν μὲν οὖν ὑπὲρ αὑτῶν δίκην ἔχουσιν οἵ γε πεισθέντες · τῆς δʼ ὑπὲρ τῶν νόμων , οὓς παραβὰς οὗτος κἀκείνους ἠδίκει καὶ νῦν ἐμὲ καὶ πάντας τοὺς ἄλλους , ὑμεῖς ἐστὲ κληρονόμοι .
21.21πάντων οὖν ἁθρόων ἓν τίμημα ποιήσασθε , ὅ τι ἂν δίκαιον ἡγῆσθε . ἐξελέγξω δὲ πρῶτον μὲν ὅσʼ αὐτὸς ὑβρίσθην , ἔπειθʼ ὅσʼ ὑμεῖς · μετὰ ταῦτα δὲ καὶ τὸν ἄλλον , ὦ ἄνδρες Ἀθηναῖοι , βίον αὐτοῦ πάντʼ ἐξετάσω , καὶ δείξω πολλῶν θανάτων , οὐχ ἑνὸς ὄντʼ ἄξιον . Λέγε μοι τὴν τοῦ χρυσοχόου πρώτην λαβὼν μαρτυρίαν .
21.22
Μαρτυρία
Παμμένης Παμμένους Ἑρχιεὺς ἔχω χρυσοχοεῖον ἐν τῇ ἀγορᾷ ,ἐν ᾧ καταγίγνομαι καὶ ἐργάζομαι τὴν χρυσοχοϊκὴν τέχνην .ἐκδόντος δέ μοι Δημοσθένους ,ᾧ μαρτυρῶ ,στέφανον χρυσοῦν ὥστε κατασκευάσαι καὶ ἱμάτιον διάχρυσον ποιῆσαι ,ὅπως πομπεύσαι ἐν αὐτοῖς τὴν τοῦ Διονύσου πομπήν ,καὶ ἐμοῦ συντελέσαντος αὐτὰ καὶ ἔχοντος παρʼ ἐμαυτῷ ἕτοιμα ,εἰσπηδήσας πρός με νύκτωρ Μειδίας ὁ κρινόμενος ὑπὸ Δημοσθένους ,ἔχων μεθʼ ἑαυτοῦ καὶ ἄλλους ,ἐπεχείρησε διαφθείρειν τὸν στέφανον καὶ τὸ ἱμάτιον ,καὶ τινὰ μὲν αὐτῶν ἐλυμήνατο ,οὐ μέντοι πάντα γε ἠδυνήθη διὰ τὸ ἐπιφανέντα με κωλῦσαι .
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 21.18 | Dem. 21.21 (English) | >>Dem. 21.24 |
